Ou c’est un mal que voulez que j’endure
En vous servant et faisant mon devoir,
Ou c’est qu’avez un cueur de pierre dure,
N’ayant en soy sentiment ne pouvoir.
Si c’est le mal, et qu’y vueillez pourvoir,
J'endureray, n’y perdant que l’attente.
Mais si je sçay que le cueur se contente
De dureté, ne voulant un vainqueur,
Chargé de mal faudra que je m’absente,
En vous laissant pleine de mauvais cueur.